Counter-Box
Stand:
03.02.2012
 |
 |
 |
 |
 |
 |
 |
 |
 |
 |
Kolumne
03.02.2012
Chor „Akzente“ bi Muscial-Spektakel
Well Karkenmusik mit Choralen un Oratorien van Händel gliek sett un as ollerwelsk un langwielig ofstempelt, de muss sük verleden Sönndag van dat Tegendeel övertügen laten. Karkenmusik kann ok modeern, in de Woorden van vandage, mitrietend un poppig wesen.
Dat hett de eerste Veranstalten ut de Riege „Gottesklang– Dat Karkenmusikjahr 2012“
bewesen: Darteihndusend Minsken wassen van dat Musical „De teihn Geboden“, dat in d’ Tui-Arena in Hannover spöölt wurr, heel andaan.
Schreven worden is dat Stück van Dieter Falk, de de Musikgruppen Pur un Monrose vörstahn un sük en Naam bi „Popstars“ maakt hett, un van Michael Kunze, de „Cats“ un „Evita“ in ’t Düütske översett un „Elisabeth“ verfaat hett. Dieter Falk vertellt, dat he van dat Thema al immer heel weg was. För hum bünt de teihn Örders för dat Tosammenleven van Minsken, de
Geschicht van Leevde un Dood, Sklaveree un Freeiheid, Gott un de Misken dat Swartbrood för sien Gloov.
Dat Besünner an dit Musical is, dat hier nich alleen de Hauptrullen in d’ Vördergrund stahn, sünnern en groot Chorprojekt achter dit Wark steiht: Minsken, de dat Singen Freide maakt, kunnen mitmaken. So bünd 3000 Singers ut 140 Choren tosamen komen. Mit so vööl Andrang harren de Organisatoren nich rekent. De Gruppe wurr daaruphen up en Namiddags-
un en Avendveranstalten updeelt. Namiddags wassen d’r ok 52 Oostfresen mit bi. De meesten daarvan hören to de Chor „Akzente“ ut Backemöör. Unner dat Leid van Gesa Goudschaal hebben se siet April all veerteihn Daag de 19 Stücken inöövt un an dree grote Proven deelnohmen. Lesde Week wassen se all en bietje upgereegt un hebben sük fraggt: „Wo mach
dat woll worden – mit so en grote Koppel van Singers ut verscheden Kuntreien för so en Publikum uptotreden?“
Dat hett all wunnerbaar klappt: De 1500 Singers hebben in hör witte Blusen en andonelk Achtergrund för de anners blot sühnig utstatt Spööldeel boden. As de Chor sük to Anfang
upstellde, gung en Gebruus dör de Halle. Bi de eerste Luden van „Wohl dem, der weiß, wie
diese Welt entstanden ist“ kregen de Tohörers en Gooshuud.
Dat Tosamenspill tüsken Chor, de Handvull Profis un dat „Junge Orchester NRW“ was en
bewunnernsweert Leistung!
Dat eenzig Haarke in de Sopp was de slechte Akkustik in de Tui-Arena. So was dat in de eerste Hälfte stuur, de enkelte Texten van Moses, Zipporah un Co. to verstahn. To ’n Glück kunnen de Tokiekers de Unnertitels van d’ Leinwand oflesen. Dat Urgesteen ut de Bibel
is weer en Beleevnis worden, dat mit Recht en brusend Bifall kregen hett. Ok för de Fans ut Oostfreesland hett sük de lange Anreis lohnt.
